“ОХУ 2018” тэмцээн дуусах дөхөж байгаа ч сенаац үргэлжилсээр. Хагас шигшээгийн Англи, Хорватын тоглолт дээр ихэнх хүн Английн баг дээр бооцоо тавьсан биз ээ. Англичууд Бразилийн шигшээ багтай таарахгүйн тулд нөгөө хөнгөхөн хэсэгт орох тактик баримталсан баг. Харин Хорват хоёр тоглолт дараалан нэмэлт цаг, пенальтид тулалдсан тул илүү ядарсан нь ойлгомжтой байлаа.
Тоглолт эхлээд л англичууд хаалттай цохилтоос гоол оруулсан. Киран Треппьерийн гайхалтай цохилтыг Субашич яаж ч чадсангүй. Тэргүүлж эхэлсэн Английн баг тоглолтыг хянаж, хорватчуудын довтолгоо эхний 30 минутад нэг л болж өгсөнгүй. Харин эхний үеийн сүүл хэсгээс хорватчууд дайрч эхлэн, ангичууд хамгаалалт асуудалтай нь мэдэгдэв. Ядарч цуцсан байх ёстой, “хөгшин” Хорватын шигшээ баг тун хурдтай байсан бол залуухан Английн баг сууж эхэллээ. Иван Перишич 68 дахь минутад Уокерийн мөргөх гэж байсан бөмбөгний урдуур орон гоол хийж, тооны харьцааг тэнцүүллээ. Иван Перишич дахиад гоол хийж болох байсан ч бөмбөг хөндлөвч оносон. Үндсэн цагт Хорватын баг илүүрхсэн ч англичууд тэсэн гарсан билээ.
Нэмэлт цагт “хөгшин” гэгдэж байсан хорватчууд илүү тоглосон хэвээр байж, Марио Манжукич багийн гол довтлогч гэдгээ чухал үед харуулан, ялалтын гоолыг оруулсан юм. Харин Английн багт ийм хүн байсангүй. Хорватын багийн ахлагч Лука Модрич багаа удирдан зохион байгуулахаас гадна зөвлөгөө өгөн, сэтгэл зүйгээр дэмжиж, зоригжуулж байсан бол Английн багийн ахлагч Харри Кейн хаа байгаа нь мэдэгдэхгүй, багийн жирийн нэг гишүүн мэт гүйж явах аж. Уг нь Английн баг лидер сайн ахлагчтай байсан бол сайхан залуучуудтай, цааш шалгарахад ойрхон байлаа. Энэ тоглолтын шилдгээр Хорватын Иван Перишич шалгарах нь ойлгомжтой.
Ийнхүү финалд Хорватын баг Францтай тоглох боллоо. 3 тоглолт дараалан 120 минут тулалдсан Хорватын багт хэцүү даалгавар ч тэд дахиад сенсаац гаргахаар хичээх нь мэдээж. Харин Англичууд ахиад Бельгийн шигшээтэй хүрэл медалийн төлөө тоглоно. "ОХУ 2018” тэмцээний хэсгийн хамгийн супер тоглолт гэгдэн, хүмүүсийн хүсэн хүлээж байсан Англи-Бельгийн тоглолт Бразилиас зугтах тоглолт болон хувирсан. Харин энэ удаад тэд үнэн хүчээр үхэх сэхэхээ үзэлцэх болов уу. Учир нь тэдэнд ДАШТ-ий хүрэл медаль гэдэг хүсээд баршгүй эрдэнэ билээ.
Хорват – Англи 2:1 (0:1, 1:0, 0:0)“Лужники”Гоол: 0:1 – 5 Триппьер, 1:1 – 68 Перишич, 2:1 – 109 Манжукич.Хорват – Субашич, Ловрен, Стринич (Пиварич, 95), Врсалько, Вида, Ракитич, Брозович, Перишич, Модрич (Бадель, 119), Ребич (Крамарич, 101), Манжукич (Чорлука, 115).Англи – Пикфорд, Уокер (Варди, 112), Стоунз, Янг (Роуз, 90), Магуайр, Алли, Лингард, Стерлинг (Рэшфорд, 74), Хендерсон (Дайер, 97), Триппьер, Кейн.Шар хуудас: Манжукич (48), Уокер (54), Ребич (96).
