Унгарын Будапешт хотноо явагдаж буй жүдо бөхийн ДАШТ-ий 6 дахь өдрийн барилдаанууд эхлэхэд хэдхэн цаг үлдлээ.
Өнөөдөр татамид эрэгтэйчүүдийн -100 кг, эмэгтэйчүүдийн -78 кг-ын жингийн бөхчүүд хүч сорих юм.
Эрэгтэйчүүдийн -100 кг-д зодоглох Ази болон Номхон далайн орнуудын залуучуудын АШТ-ий хүрэл медальт, энэ оны Азийн АШТ-ий VII байрт шалгараад буй Б.Хүдэрчулуун эхний тойрогт гоц мөргөлөө.
Тэрбээр шигшээ 32-д Их Британийн бөх, U23 ангиллын Европын АШТ-ий мөнгөн медальт Оливер Барраттай барилдана. Эдгээр бөхчүүдийн аль алин нь Насанд хүрэгчдийн ДАШТ-д анх удаа зодоглож байна.
Ялсныг нь Тажикстаны тамирчин, Азийн АШТ-ий хошой хүрэл медальт Жахонгир Маджидов угтах магадлалтай.
Уг хэсгийг Японы бөх, өнгөрсөн оны ДАШТ-ий хүрэл медальт, цэл залуухан 20 настай Дота Арай толгойлж байна. Түүний хувьд, Их дуулгын хошой аварга төдийгүй мөнхүү ангиллаас таван медальтай хүчтэн билээ.
Б.Хүдэрчулуун өдгөө 22 настай тамирчин юм.
Харин -78 кг-ын жинд Монголоос бөх оролцсонгүй.
