Дэлхий дээр маш олон төрлийн сонин, хачин мэргэжлүүд байдгаас энэ удаад бид хамгийн сонирхолтой 5 мэргэжлийг танилцуулахаар бэлтгэлээ.
1. Мэргэжлийн тэврэгч (Professional Cuddler)
Мэргэжлийн тэврэгч нь хүмүүсийн стрессийг тайлж, сэтгэл зүйг дэмжих зорилгоор тэврэх үйлчилгээ үзүүлдэг. Стресс ихтэй хотууд, оффисын ажилчид ихтэй газар (АНУ, Япон, Их Британи) эрэлттэй байдаг бөгөөд стресс ихсэх тусам тус мэргэжлийн эрэлт ихэсдэг байна. Албан ёсны мэргэжлийн урт хугацааны сургалт байхгүй ч, Cuddle Sanctuary (АНУ) гэх мэт байгууллагууд богино хугацааны сургалт зохион байгуулдаг. Мөн тус ажилд сэтгэл судлалын мэдлэгтэй байх нь давуу талтай байдаг аж.
Дундаж цалин: АНУ-д цагийн хөлс 40–80 ам.доллар хооронд хэлбэлздэг.
2. Мөсөн уул хөдөлгөгч (Iceberg Mover / Iceberg Remover)
Том мөсөн уулыг газрын тосны платформ, боомт эсвэл тээврийн замд саад болохоос сэргийлэх зорилгоор хөдөлгөдөг. Канад, АНУ (Аляска), Норвеги зэрэг мөсөн уул ихтэй далайтай улс орнуудад эрэлттэй байдаг.Эрчим хүч, далайн судалгаа, далайн инженерийн мэргэжилтэй хүмүүст энэ чиглэлээр ажиллах боломж нээлттэй. Маш өндөр эрсдэлтэй ажил тул цөөн хүмүүст ажиллах эрх олгогддог ажээ.
Дундаж цалин: Жилд 50,000–100,000 ам.доллар хооронд хэлбэлздэг.
3. Амьтны сэтгэлзүйч (Animal Psychologist / Animal Behaviorist)
Амьтны зан үйл, сэтгэл зүй, биеийн болон оюун ухааны зан байдлыг судалж, зан байдлыг нь сайжруулах сургалт хийх нь энэ мэргэжлийн онцлог. Амьтны хүрээлэн, нохой, муурны сургууль, фермерийн аж ахуйд эсвэл хувийн дасгалжуулагчаар мөн ажилладаг. Тус мэргэжлээр АНУ-н University of California, Davis – Animal Behavior мэргэжил, Их Британи-д University of Edinburgh – Applied Animal Behaviour and Animal Welfare зэрэг мэргэжлээс сонгон суралцах боломжтой. Одоогоор бусад улсуудад тус мэргэжил төдийлөн дэлгэрээгүй байгаа юм.
Дундаж цалин: Жилийн цалин 40,000–80,000 ам.доллар.
4. Ариун цэврийн цаасны чанар шалгагч (Paper Towel Tester / Paper Product Quality Tester)
Ариун цэврийн цаас, салфетка, цаасны сав баглаа боодлын чанар, үнэр, бат бөхийг шалгадаг. Хэрэглэгчдэд очиход ямар нэгэн гэмтэлгүй, хэрэглэгчдэд харшил үүсгэхгүй байх тал дээр мөн анхаарч ажилладаг байна. Цаасны үйлдвэр, судалгааны лабораторитай аль ч улсад ажиллах боломжтой. Энэ чиглэлээр ажиллахын тулд инженер, химийн технологи, материал судлалын чиглэлээр их сургуульд суралцах шаардлагатай.
Дундаж цалин: АНУ-д цагийн хөлс 15–25 ам.доллар, туршлагатай ажилтан байх тусам цалингийн хэмжээ өндөрсдөг ажээ.
5. Өт түүгч (Worm Picker / Worm Farmer)
Загасны тэжээл, компост үйлдвэрлэх зориулалтаар өт цуглуулж, зарж борлуулдаг ажилтан. Фермерийн газар, загасны аж ахуй, био-компост үйлдвэрүүдэд ажиллах боломжтой. Хөдөө аж ахуй, биологи, экологи, фермерийн сургалтыг дүүргэсний дараа энэ мэргэжлээр ажиллаж болно.
Дундаж цалин: Цалин бага боловч энэ чиглэлээр бизнес эрхэлбэл ашигтай. Монголд ч мөн энэ талын бизнес байдаг бөгөөд нэг ширхэг өтийг 1000 төгрөгөөр зарим газар худалдаалдаг.
