1640 онд анхны шангаа татсан Даншиг наадам хэмээх уламжлалт баяр наадмыг 2015 оноос сэргээж, жил болгон зохион байгуулж эхэлсэн билээ.
“Хүрээ цам” Даншиг наадам 2024 арга хэмжээ 8-р сарын 3, 4-ний өдрүүдээр Хүй 7 худагт явагдаж өндөрлөлөө. Өнөө жил Үндэсний бөхийн барилдааны тавын даваа эхлэхийн өмнө цол олгохгүй хэмээн зарлаж, эл шийдвэрээс үүдэн бөхчүүд барилдахгүй гэсэн юм. Улмаар баяр наадам сунжирч, зохион байгуулагчдын зүгээс энэ жилийн Даншиг наадамд хамгийн сүүлчийн удаа цол олгохоор шийдвэрлэсэн.
Архангай аймгийн Булган сумын харъяат улсын арслан Ренчинбямбын Пүрэвдагва 2015 онд түрүүлж Даншигийн арслан, 2016 онд түрүүлж Даншигийн аварга, 2017 онд түрүүлж Даншигийн даян аварга, 2018 онд түрүүлж Даншгийн дархан аварга цолыг хүртсэн билээ.
Харин 2019 онд Хөвсгөл аймгийн Галт сумын харьяат улсын өсөх идэр начин Чинчулууны Батчулуун, 2022 онд Завхан аймгийн Алдархаан сумын харьяат улсын харцага Лхагваагийн Лха-Очир, 2023 онд Архангай аймгийн Батцэнгэл сумын харьяат улсын үнэн зоригт харцага Батсүхийн Зоригтбаатар нар түрүүлж, Даншигийн арслан цолонд хүрээд буй.
Тэгвэл өнөө жил сүүлчийн удаа Даншигийн цол олгов. Эл барилдаанд түрүүлсэн Архангай аймгийн Хашаат сумын харьяат улсын заан Сүхбаатарын Сүхбат Даншигийн арслан, үзүүрлэсэн Архангай аймгийн арслан Галбадрахын Мөнхбаяр Даншигийн заан цол хүртлээ.
Сонирхуулахад, эл наадамд цол олгодгоос үүдэн бөхчүүд найраа хийх нь илэрхий болсоны тод жишээ нь өнгөрсөн жил Даншигийн начин цолоо хураалгасан “Самъяа” хийдийн бөх Б.Галсайханы тохиолдол юм.
Өнгөрөн жил Даншигийн начин цолны болзол хангасан Завхан аймгийн Алдархаан сумын харьяат "Самъяа" хийдийн бөх, аймгийн начин Б.Галсайхантай гурвын даваанд барилдахаар сугалаа татсан улсын өсөх идэр начин Нурланы Мустафа талбайд гарч зодоглоогүй бол дөрвийн даваанд улсын начин Эрдэнэцогтын Ванданцэрэн худлаа барилдаж, тавын даваанд улсын өсөх идэр начин Чинчулууны Батчулуун барилдахгүйгээр тахим өгсөн тул наадмыг үл хүндэтгэсэн хэмээн үзэж Б.Галсайханг тус наадмаас хассан билээ.
