2025 оны зургаадугаар сард спортын ертөнцөд түүхэн үйл явдал тохиолоо. Америкийн Үндэсний сагсан бөмбөгийн холбооны (NBA) нэр хүндтэй баг болох Лос Анжелес Лэйкерс 10 тэрбум ам.долларын үнэлгээтэйгээр шинэ эзэнд шилжив. Энэ нь зөвхөн багийн арилжаа биш, харин спорт, бизнес, өв соёлын огтлолцлын цэг дээр бичигдсэн түүхэн гэрээ байлаа.
Лэйкерс бол Лос Анжелес хотын бахархал, дэлхийн сая сая хөгжөөн дэмжигчдийн итгэл найдвар, NBA-ийн алтан түүхийн гол дүр. 1979 онд Jerry Buss ердөө 67.5 сая долларын үнээр худалдан авч, 46 жилийн турш гэр бүлээрээ удирдаж иржээ.
Гэвч цаг хугацаа өнгөрөхийн хэрээр спортын салбар ч өөрчлөгдөж, багийн эзэмшлийн тогтолцоо, хөрөнгө оруулалтын хэмжүүр, стратеги бүхэн өөр шатанд гараад буй энэ үед Буссын гэр бүл багийнхаа хувьцааны дийлэнх хэсгийг шилжүүлэх шийдвэр гаргасан нь нэг талаар гунигтай, нөгөөтэйгүүр оновчтой алхам байв. Багийн одоогийн захирал Jeanie Buss аавынхаа өвийг үргэлжлүүлэхдээ “Лэйкерсийг илүү хүчирхэг ирээдүйд хүргэхийн тулд хүчтэй хамтрагч хэрэгтэй” гэж мэдэгджээ.
Jeanie Buss багийн удирдлагын “Governor” буюу гүйцэтгэх удирдагчаар үргэлжлүүлэн ажиллах ба Буссын гэр бүл тодорхой хэмжээний хувь эзэмшлээ хадгалах аж.
Шинэ эзэмшигч Mark Walter нь “Guggenheim Partners” компанийн гүйцэтгэх захирал бөгөөд мөн “Los Angeles Dodgers” бейсболын баг, “Sparks” эмэгтэйчүүдийн сагсан бөмбөгийн багуудыг амжилттай удирдаж ирсэн. Түүн шиг спортын үнэт зүйлийг ойлгодог хөрөнгө оруулагч гарч ирсэн нь зөвхөн тоон үзүүлэлт биш, багийн сэтгэлгээг дэмжих бодит хөшүүрэг болох юм.
Гэрээний дүн болох 10 тэрбум ам.доллар нь NBA-ийн түүхэнд хамгийн өндөр үнэлгээтэй наймаа болжээ. Өмнөх рекорд болох “Boston Celtics” баг 2024 оны сүүлчээр 6 тэрбум ам.доллароор зарагдах хэлцэл хийгдсэн ч NBA-ийн зөвлөлөөс зөвшөөрөл хүлээж байгаа аж. Гэвч ердөө жилийн дотор Лэйкерс уг үнэлгээг 4 тэрбумаар давж, спортын зах зээлийн хурдацтай өсөлтийг батлан харууллаа.
Лэйкерсийн энэ шилжилтээс бид нэг зүйлийг ойлгож болно. Спорт бол бизнес мөн, гэхдээ түүх, үнэт зүйл, соёлын өвийг дагуулсан бизнес юм. Хамгийн өндөр үнэ төлсөн нь баг эзэмших эрх авч байгаа бус, түүхэнд тогтсон байр суурийг үргэлжлүүлэх хариуцлагыг ч үүрч буй хэрэг.
Нийтлэлийг бэлтгэсэн: Г.Болор
