Хичээлийн шинэ жил эхэлж цахим орчинд сургуулийнхаа үүдэнд зогсоо хүүхдүүдийн зургууд ар араасаа цуварсаар... Гэвч баярт мөчөө хуваалцан нийтэлсэн таны хүүхдийн зургийг хэн үзэж байгаа, үнэхээр аюулгүй эсэхийг та мэдэх үү?
#1 Хүүхдийнхээ аюулгүй байдалд халдаж мэдэх мэдээллийг ил болгосон эсэхийг бодолц
Сургуулийн хаяг, анги, хүүхдийн нэрийг таны оруулсан зургаас шууд харах боломжтой байгаа юм биш биз? Таны нэр ч сошиал сүлжээнд харагдах тул хүүхдийнхээ зургийг оруулахдаа дээрх мэдээллээ нууцалсан нь дээр. Сургуулийнх нь хаягийг л мэдэж байхад муу санаат хүмүүс хүүхдэд ямар аюул учруулж болзошгүйг та мэдэхгүй.
#2 Таны сошиал сүлжээ үнэхээр аюулгүй газар мөн үү?
Та сошиалд хэчнээн найзтай, хэчнээн дагагчтай вэ? Тэр бүх хүнийг та таних уу, таньдаг ч мэдээллээ хуваалцах хэмжээнд итгэдэг үү? Эдгээрийг бодолцон хүүхдийн зургийг нийтлэхдээ ойр дотны хүмүүстээ л харагдах тохиргоо хийх, эсвэл зөвхөн гэр бүлийн гишүүддээ зургийг нь чатаар явуулах, гэр бүлийнхээ группт оруулах зэргээр аюулгүй орчныг бий болгоорой.
#3 Зургаа оруулахаас өмнө хүүхдээсээ зөвшөөрөл аваарай
"Жаахан хүүхэд юу л ойлгов гэж?" хэмээн хүүхдийнхээ эрхэнд бүү халдаарай. Хүүхдээ хүндэтгэж, хувийн орон зай эрх чөлөөнд нь үл халдан зөвшөөрөл авах л хэрэгтэй. Таны хүүхдээрээ бахархан оруулсан зураг өөрийнх нь хувьд ичгэвтэр, санаа зовмоор ч мэдрэгдэж болно шүү дээ.
#4 Сэтгэлийн үгээ постоор бус амьд харилцаагаар илэрхийлэх
Хүүхдэдээ зориулж буй үгсээ цахим орчинд нийтлээд өөрт нь хэлдэггүй юм биш биз? Тэр уншихгүй ч байж магадгүй шүү дээ. Өөрт нь зориулах үг, баярын мэнд, бахархлаа амьдаар хэлээд хүүхдээ тэврээрэй.
