ОХУ-аас олон нийтийн ВКонтакте, “Telegram” сүлжээний үүсгэн байгуулагч Павел Дуровыг интерполын шугамаар эрэн сурвалжилж эхэлжээ. Түүнийг алан хядагчдын жагсаалтад оруулсан байна.
ОХУ-аас Дуровт олон улсын алан хядагчдын үйл ажиллагаанд тусалсан, “Telegram” сүлжээний удирдагчид нь алан хядагч байгууллагуудын Оросын эсрэг үйл ажиллагаандаа ашигладаг суваг, чатыг устгадаггүй гэсэн ял тулгажээ.
2026 онд ОХУ-ын тусгай албаны тавьсан хамтран ажиллах саналыг Дуров зөвшөөрөөгүй тул ОХУ-д “Telegram” сувагт орох боломжийг хязгаарласан. 2026 оны эхнээс тус сувагт нийт 100 сая рублийн торгууль оноогоод байсан юм. Австрали, Франц улс ч Павел Дуровт мөн алан хядагчдыг өөгшүүлэн дэмжсэн гэсэн хэрэг үүсгээд байгаа. Харин Дуров өөрийн сүлжээг ямар нэг засгийн газарт ашиглуулахгүй гэсэн хатуу байр суурьтай байгаа юм.
Өөрийг нь ОХУ-д эрэн сурвалжилж эхэлсэнтэй холбогдуулан Павел Дуров мем зураг нийтлэн, “Алан хядагч “Талибан” хөдөлгөөн Оростой түнш болоод би яахаараа алан хядагч байдаг билээ” гэж хариу барьсан байна.
