Европын Үндэстнүүдийн лигийн тэмцээний финалын тоглолт ням гарагт явагдлаа.
Шийдвэрлэх энэ тоглолтод Португалчууд, “Ялагдашгүй Армада” хочит Испанийн шигшээг торгуулийн цохилтоор буулгаж авсан.
Энэ тоглолт 2:1 харьцаатай Испаничуудын тэргүүллээр үргэлжилж байх үед Португалийн ахлагч Криштиано Роналду 61 дэх минутад тэнцээний гоолыг оруулсан юм. Тэрбээр шигшээ багийнхаа өмнөөс 138 дахь гоолоо бүртгүүлснээр өөрийн эзэмшдэг дэлхийн дээд амжилтыг ахиулсан.
Улмаар торгуулийн цохилтоор ялалт байгуулсан Португалчууд Үндэстнүүдийн лигийн хошой аваргаар тодров. Энэ нь том ахын эрин үед Португалчуудын хүртэж буй гурав дахь цом юм.
Харин Испаничууд 2023 оны Үндэстнүүдийн лиг, 2024 оны Европын АШТ-д дараалан түрүүлсэн үнэмлэхүй амжилтаа тасалдууллаа.
Бельгийн алтан үеийнхнийг удирдах хугацаандаа ганц ч цом авч чадаагүй Роберто Мартинез Португалийн шигшээг дасгалжуулж, шигшээ багийн түвшин дэх анхны цомоо атгалаа. Тэрбээр 2023 оны нэгдүгээр сард Португалийн багт ирсэн билээ.
Хэдийгээр Үндэстнүүдийн лиг гэдэг дэлхийн хамгийн том тэмцээн биш ч гэлээ Европын улс орнуудын түрүүлэх бололцоотой гуравхан тэмцээний нэг юм.
