Саудын Арабын “Аль-Насср” багийнхан дэлхийн шилдэг хөлбөмбөгчин Криштиано Роналдугийн хилэнг дарахаар солилцоо наймаанд эрчимтэй ажиллаж байна.
Тэд өнөөдөр “Байерн Мюнхен”-ий жигүүрийн тоглогч Кингсли Команыг худалдан авч, гурван жилийн гэрээнд гарын үсэг зурлаа.
Арабчууд түүний өртөгт 30 сая еврогийн ханш төлсөн байна.
Тэд энэ зун Роналдугийн гэрээг ахин сунгаж, “Челси”-гээс довтлогч Жоао Феликс, “Барселона”-гаас хамгаалагч Иниго Мартинез нарыг авчирсан билээ.
Мөн дасгалжуулагчаараа Португал мэргэжилтэн Хорхе Жезүсийг сонгосон.
Харин “Байерн”-ий энэ зун хийсэн гол наймаа бол “Ливерпүүл”-ээс 75 сая еврогоор авчирсан жигүүрийн довтлогч Луис Диаз юм.
Өдгөө 29 настай Команы тухайд 2015 оны наймдугаар сард анхлан зээллэгээр “Байерн”-д газардсан. Тэрбээр Германд ирээд 339 тоглолтод оролцохдоо 72 гоол оруулж, 71 гоолын дамжуулалт бүртгүүлсэн байна.
Үүнээс өмнөх түүхийг нь сөхвөл, “ПСЖ”-гийн академид 10 жил бэлтгэгдэн, 2014 онд “Ювентус” рүү буурь сэлгэсэн байдаг.
Энэ зуурт тэр Францын шигшээ багийн өмнөөс 58 тоглолтод оролцож, 8 гоолыг оруулаад байгаа юм.
Түүний цуглуулгад “Лиг-1” болон Серие А лигийн тус бүр хоёр, Бундес лигийн ес, Аваргуудын лиг болон Клубүүдийн ДАШТ-ий тус бүр нэг цом бий.
