1 мин

Хиймэл оюун ухаант чатбот хууль, бизнесийн сургуулийн шалгалтуудад тэнцжээ

Ub.life 2023.01.27

Дэлхий нийтийн анхаарлыг татаад байгаа хиймэл оюун ухаант “ChatGPT” чатбот саяхан Миннесотагийн их сургуулийн төгсөх курсийн шалгалт, Пеньсилванийн их сургуулийн Вартон бизнесийн сургуулийн шалгалтыг амжилттай давжээ. Миннесотагийн их сургуулийн багш нар “ChatGPT”-гаас хариултын сонголт бүхий 95 асуулт, 12 эсээний асуултаар шалгалт авч үзэхэд дунд сурдаг оюутны түвшинд хариулжээ. Харин Вартон сургуулийн бизнес менежментийн шалгалтад илүү сайн буюу B, B- үнэлгээ авсан гэнэ.

Вартон сургуулийн профессор Кристиан Тервиш “ChatGPT менежментийн суурь ойлголт болон дүгнэлт боловсруулах асуултуудад үнэхээр сайн хариулсан боловч математикийн энгийн асуултад гайхмаар алдаа гаргалаа” гэжээ.

Оюутнууд “ChatGPT”-ийн тусламжтайгаар гэрийн даалгавраа хуулах боломжтой болсонд багш нарын санаа зовниж байгаа аж. Оюутнууд энэ технологийг хэр өргөн ашиглаж байгаа болон сурлагад нь хэр хор нөлөө учруулж болох талаар дүгнэхэд одоохондоо эрт байна хэмээн шинжээчид хэлж байгаа ч сургалтад тодорхой хэмжээгээр нэвтрүүлэх шаардлага нэгэнт үүссэн гэдэгт эргэлзэхгүй буй. Миннесотагийн их сургуулийн профессор Жон Чой “AI буюу хиймэл оюун ухаант туслахууд ирээдүйд хуульчдын энгийн хэрэглээ болох байх. Хуулийн сургуулиуд үүнд оюутнуудаа бэлдэх хэрэгтэй” гэжээ. К.Тервиш мөн энэ технологийг сургалтын тэнхимд байх хэрэгтэй гэж үзэж байгаагаа хэлээд, “Хэрэв бид өмнөх шигээ хуучны боловсролын системээр явбал “ChatGPT”-ийн ачаар хэрэгжүүлж болох гайхалтай боломжуудыг алдах болно” гэжээ.

“ChatGPT” хэрэглэгчийн хүсэлтийн дагуу эсээ, өгүүллэг, дууны үг шинээр боловсруулахад ашиглагдаж буй. Мөн судалгааны ажлын хураангуйг боловсруулсан нь хүн бичсэн гэхэд итгэхүйц сайн болжээ хэмээн зарим эрдэмтэн онцолсон юм.

Эх сурвалж: CNN